தோற்றம்

தஞ்சாவூர் மறைமாவட்டம் 22 நவம்பர் 1952 ஆம் ஆண்டு நிறுவப்பட்டது. அண்ணாநகர் புனித செபஸ்தியார் ஆலயத்தைத் தலைமையிடமாகக் கொண்டு அதனை சுற்றியுள்ள கத்தோலிக்க மக்களின் ஆன்மீக நலனைக் கருத்தில் ஏற்று இப்புதிய பங்கு 03.12.2000 அன்று ஆயர் தேவதாஸ் அம்புரோஸ் அவர்களால் நிறுவப்பட்டது. இப்பங்கு, மாபெரும் ஜூபிலி 2000 ஆம் ஆண்டில் தஞ்சை ஆயர் மேதகு ம.தேவதாஸ் அம்புரோஸ் ஆண்டகை அவர்களால் நிறுவப்பட்ட முதல் பங்கு என்பது குறிப்பிடத்தக்கது.

இந்தியாவின் தென்பகுதியிலிருந்து பர்மாவில் குடியேறி வாழ்ந்து வந்த இந்தியர்கள் திடீரென்று பர்மா அரசு வெளியிட்ட ஆணையின்படி அந்நாட்டிலிருந்து வெளியேற்றப்பட்டனர். இந்த அவல நிலையில் இந்தியாவிற்கு வந்தவர்களை, மறைந்த அருட்தந்தை மோன்சிங்ஞோர் பின்டோ வரவேற்று, தம் அன்பினால் ஈர்த்தார். பர்மாவிலிருந்து அகதிகளாக வந்த இவர்களுக்கு சாதி. மத வேறுபாடின்றி கல்வியிலும், பொருளாதாரத்திலும் வளர்ச்சிபெற ஆவண செய்தார். அவர்களின் ஆன்ம நலனை கருத்தில் கொண்டு புனித செபஸ்தியார் ஆலயத்தைக் கட்டினார். அதன்பிறகு தஞ்சை மறைமாவட்டப் பேராலய பங்குத்தந்தையாக இருந்த அருட்திரு குழந்தைநாதர், அருட்திரு ஆர்.சவரிமுத்து ஆகியோரின் பெரும் முயற்சியால் கூரைக் கோவிலாக இருந்த புனித செபஸ்தியார் ஆலயம் கட்டடமாக எழுப்பப்பட்டது. தஞ்சையின் பங்கு குருக்கள் எடுத்த பெரும் முயற்சியால் இது தற்பொழுது தனிப்பங்காக உயர்த்தப்பட்டு, அருட்திரு. எம்.எ. மெல்கியாஸ் அவர்கள் இதன் முதல் பங்குத்தந்தையாகப் பொறுப்பேற்றுச் சிறப்பாக பணியாற்றினார். மக்களின் வசதிக்காக புதிய ஆலயம் கட்ட இடம் வாங்கப்பட்டுக் கட்டுமானப் பணிகள் துவங்கப்பட்டன.

ஆன்மீகப் பணிகள்

இப்பங்கு மக்கள் ஆன்மீகத்தில் மிகுந்த ஈடுபாடு உள்ளவர்கள், பங்கின் பல்வேறு பணிகளில் பங்குத் தந்தைக்குச் சிறந்த ஒத்துழைப்பு நல்கிவருகின்றனர், அன்பியங்கள் தொடங்கப்பெற்றுச் சிறப்பாக நடைபெறுகின்றன. இப்பங்கிலிருந்து அருட்தந்தை எஸ்.அந்தோணிராஜ், அருட்தந்தை ஏ.சவரிமுத்து, அருட்தந்தை எப்.ஆரோக்கியசாமி, அருட்தந்தை சூசை அருள், அருட்தந்தை ஜோசப் குழந்தைசாமி, அருட்தந்தை ரீகன் ஜெயக்குமார். அருட்தந்தை அலெக்சாண்டர் சுரேஷ் ஆகியோர் குருக்களாகப் பணியாற்றி வருகின்றனர். இளம் பெண்கள் சிலர் பல்வேறு துறவற சபைகளில் அருட்சகோதரிகளாகவும் பணியாற்றுகின்றனர்.

கல்விப் பணிகள்

இப்பங்கில் கிறிஸ்து ராஜா மேல்நிலைப்பள்ளி இயேசுவின் சகோதரிகள் பொறுப்பிலும், மேலும், புனித வளனார் மேல்நிலைப்பள்ளி மற்றும் பான்செக்கர்ஸ் கலைக்கல்லூரி ஆகியவை புனித அடைக்கல அன்னை அருட்சகோதரிகள் பொறுப்பிலும் நடைபெறுகின்றன. இப்பங்கின் மாணவ மாணவியர் மறைமாவட்டத்திலுள்ள இதரப் பள்ளிகளிலும் பயின்று வருகின்றனர்.

பங்கின் கிளை கிராமங்களும், மக்கள் தொகையும் 2000-ல்

தஞ்சை நகர்ப்பகுதி (879), நாஞ்சிக்கோட்டை (66), வஸ்தா சாவடி (179), யாகப்பா சாவடி (44), பதுவன் சாவடி (252), உச்சிமாஞ்சோலை (34), கண்டிதம்பட்டு (121),கரை மீண்டார்கோட்டை (43), வாண்டையார் இருப்பு (56), அருமலைக்கோட்டை (15), மடிகை (28), சுரக்கோட்டை (20). நெல்லுப்பட்டு (10), தில்லை நகர் (114), பாரதிதாசன் நகர் (46). ராஜராஜன் நகர் (363) ஆகியவை பங்கின் கிளைக் கிராமங்கள். மொத்தக் கத்தோலிக்க குடும்பங்கள் 457, மொத்த ஆண்கள் 1119, மொத்தப் பெண்கள் 1151, மொத்தக் கத்தோலிக்கர் 2220.